Haradinaj thërret seancë të jashtëzakonshme nesër në orën 9:00

Vetëm një orë para se të nisë seanca e jashtëzakonshme e cila është thirrur nga partitë opozitare, Kryeministri i Kosovës, Ramush Haradinaj ka thirrur seancë të jashtëzakonshme.

Kjo u bë e ditur pas mbledhjes së kryesisë e cila ishte thirrur mbrëmjen e sotme.

Kryetari i Kuvendit, Kadri Veseli tha se është vetëm një pikë e rendit të ditës, ajo e krijimit të ekipit  negociator me Serbinë.

“Është kërkesë e kryeministrit që të kemi një seancë nesër në ora 9, është kërkesë legjitime e kushtetuese. Pikë e rendit të ditës do të jetë krijimi i ekipit negociator nga ana e Qeverisë së Kosovës”, tha Veseli, shkruan Albinfo.ch.

Ai gjithashtu kërkoi nga të gjitha partitë që të jenë të bashkuar dhe të përballen me Serbinë.

“Shpresoj që opozita nga nesër të reflektoj. Ne së bashku, pozitë e opozitë do të kemi ballafaqim me një shtet që i ka shkaktuar dhimbje Kosovës e që ka qenë agresor ndaj nesh. Ne duhet të jemi bashkë përballë Serbisë”, tha kryetari i Kuvendit, Kadri Veseli.

Në anën tjetër seancën e thirrur nga kryeministri e ka kritikuar, shefi i grupit parlamentar të PSD-së, Dardan Sejdiu.

Sipas tij ftesa nga ana e kryeministrit për seancë të jashtëzakonshme është e pakuptimtë.

“Do të bisedojmë me deputetët, por nuk ka kuptim që të vijmë në ora 9, kur në ora 10 kemi mbledhje për temën e njëjtë”, tha Sedjiu.

---