Hungaria vendos për internimin e refugjatëve

Projektligji parasheh që refugjatët të mbahen në një “zonë transiti” në afërsi të kufijve, gjithë kohën derisa të përmbyllet procedura e tyre e azilit

KEYSTONE

Parlamenti i Hungarisë ka votuar sot në favor të internimit të refugjatëve. Votimi i projektligjit përkatës është bërë i mundur me votat e pozitës konservative të djathtë dhe partisë së ekstremit të djathtë Jobbik, që është në opozitë. Gjithsej për projektligjin kanë votuar 138 deputetë, vetëm 6 kanë qenë kundër dhe 22 të përmbajtur, shkruan srf.ch.

Projektligji parasheh që refugjatët të mbahen në një “zonë transiti” në afërsi të kufijve, gjithë kohën derisa të përmbyllet procedura e tyre e azilit.

Vendimi vlen sikur për refutgjatët e ardhur rishtas ashtu edhe për azilkërkuesit që tashmë ndodhen në Hungari, transmeton albinfo.ch. Në vitin 2013, nën presionin e BE-së, Hungaria pati hequr dorë nga një formë e ngjashme internimi të refugjatëve.

Gjatë vitit 2016 në Hungari kanë kërkar azil 29.432 persona. 425 prej tyre e kanë fituar të drejtën e azilit. Ndërsa nga fillimi i këtij viti në këtë vend janë regjistruar gjithsej 345 refugjatë të rinj.

Siç dihet, në vitin 2015 Hungaria për të ndalur fluksin e refugjatëve që vinin përmes Ballkanit kishte ngritur tela me gjemba përgjatë gjithë kufirit të saj jugor.