I jepet lamtumira e fundit katër personave që humbën jetën në aksident

U është dhënë lamtumira e fundit katër personave që kanë humbur jetën mbrëmë në aksidentin që ndodhi në Mramor.

Kryeministri i Kosovës, Ramush Haradinaj ka qenë i pranishëm në Gjilan, ku ka shprehur ngushëllime familjarëve të viktimave.

“Familjes Shala nga Poneshi i Gjilanit, e cila nga aksidenti i djeshëm humbi katër familjarë, i shpreha ngushëllimet më të thella, në emër të Qeverisë dhe tërë popullit të Kosovës. Qeveria e vendit, edhe përmes ndihmës financiare, do t’u qëndrojë afër në këtë humbje të madhe”, ka shkruar Haradinaj në rrjetet sociale, përcjell albinfo.ch.

Ndërkohë, Familjarët fajësojnë eskortën e ambasadores turke si shkaktar të aksidentit.

Në bisedimet e tyre me familjarë të atyre që humbën jetën, ata akuzojnë eskortën e ambasadores turke, Kivilcim Kiliç, si shkaktar të aksidentit.

Ndërkohë, Prokuroria Themelore e Prishtinës thotë se dyshimet e para për aksidentin e mbrëmshëm tragjik ku mbetën të vdekur 4 persona në mesin e të cilëve edhe ambasadorja e Turqisë në Kosovë janë se një veturë e tipit “Opel Corsa”, ka qenë shkaktari i aksidentit.

Prokurori përgjegjës për komunikim me media në Prokurorinë Themelore të Prishtinës, Ibrahim Berisha, ka thënë për KTV-në se dyshimet e para janë se kjo veturë ka hyrë gabimisht në tejkalim.

Por ai ka shtuar se mbetet që vlerësimin përfundimtar për aksidentin në të cilin u përfshinë tre vetura, ta jap eksperti i komunikacionit që ka qenë në vendin e ngjarjes bashkë me ekipe e tjera të forenzikës.

Berisha, nuk ka përjashtuar mundësinë që edhe ndonjëra nga veturat e tjera të kenë bërë shkelje të rregullave të komunikacionit.