“Ideja për shkëmbimin e territoreve, tragjike”

Kryetari i Lëvizjes Vetëvendosje, Albin Kurti, ka deklaruar se kufijtë duhet të konsiderohen të Kosovës dhe asnjë person nuk ka të drejtë të diskutojë në tavolinë për to.

 Në tryezën “Loja me kufij: luftë apo zgjidhje në Ballkan”, u tha se ideja për shkëmbim të territoreve është tragjike për qytetarët e Kosovës.

Sipas Kurtit, deklaratat e presidentit Thaçi për korrigjimin e kufijve dhe se marrëveshja do të jetë e dhimbshme, kanë tendencë që të na kthejnë në vitin 2007, kur nuk e kishim statusin e definuar. 

“Ky person pas gjashtë vjetësh negociata të pasuksesshme pretendon se e ka shkopin magjik për të na zgjidhur problemin me Serbinë. Unë besoj që bëhet fjalë për dy autokratë. Ka mbetur që djali i Thaçit të martohet me vajzën e Vuçiqit dhe jemi tamam sikur dikur para katër apo pesë shekujsh”, ka thënë Kurti.

Ndërsa, shefi i grupit parlamentar të LDK-së, Avdullah Hoti, deklaroi se kjo parti nuk është kundër dialogut, por kërkojnë që zgjidhja të bëhet në mënyrë të mençur.

Mirëpo, tha se ideja për shkëmbimin e territoreve nuk sjell as njohje, as anëtarësim në OKB.

Ndërsa, zëvendëskryeministri  Enver Hoxhaj i ka ftuar partitë opozitare të bashkohen për interesa shtetërore dhe unitet, e pastaj tha se do të pajtohen për ekipin negociator, platformën negociuese, vijat e kuqe, zbatimin e shumëçka tjetër.

---