Iliria në histori të futbollit shqiptar në Zvicër

Kjo skuadër ka arritur sukses historik, duke u bërë klubi i parë shqiptar që fiton Kupën e futbollit në Kanton Solothurn

Iliria ka hyrë në histori të futbollit shqiptar në Zvicër. Kjo skuadër ka arritur sukses historik, duke u bërë klubi i parë shqiptar që fiton Kupën e futbollit në Kanton Solothurn. Në finalen e madhe të zhvilluar më 5 maj në stadiumin e FC Solothurnit, FC Iliria edhe pse kishte epërsi prej 2:0, u desh që me anë të penalltive ta mposht ekipin e Fulenbachit, me rezultat 7:4, pasi që loja përfundoi me rezultat të barabartë 2:2.

Të dy golat për FC Ilirinë i ka shënuar sulmuesi Mead Demiri. Ndeshjen e ndoqën mbi 2500 tifozë dhe pa dyshim që pjesa më e madhe ishin tifoz shqiptarë të veshur kuqezi, me flamurin kombëtar dhe mbështetjen e madhe nga tribunat e stadiumit, shkruan “shqiptari.eu”, përcjell albinfo.ch.

Ndeshjen e përcolli edhe kryetari i Unionit të Klubeve Shqiptare të Futbollit në Zvicër, Skënder Thaçi, i cili në një prononcim për “Syri Blue” e vlerësoi si sukses historik fitoren e FC Ilirisë.

Sulmuesi i ekipit shqiptar në Zvicër, FC Iliria, Mead Demiri i cili shënoi dy gola në finalen e Kupës së Solothurnit ndaj Fulenbachit, ndjehet i emocionuar që ka shënuar golat e epërsisë për ekipin “Kuqezi”.

“Pas ndeshjes ishin emocione te mëdha, pasi dhe shënova dy gola për epërsinë e ekipit tonë. E gjithë ekipi, kryesia dhe unë sidomos e patëm vetëm një qëllim, ta fitojmë Kupën”, u shpreh për “Radio Vala”, futbollisti Mead Demiri.