Iniciativa kundër migracionit masiv, “lojë me zjarrin”

Në komitetin që kundërshton "Iniciativën kundër migracionit masiv", marrin pjesë përfaqësues të të gjitha partive tjera veç SVP/UDC dhe SP/PS-së

Sot në Bernë kanë mbajtur një konferencë shtypi kundërshtarët e iniciativës “Kundër migracionit masiv”, të SVP/UDC-së. Siç dihet tashmë, për këtë iniciativë do të votohet më 9 shkurt, dhe përmes saj kërkohet që Zvicra të fusë sërish në fuqi politikën e kontingjenteve dhe kuotat për numrin e të huajve që mund të hyjnë për të jetuar dhe punuar në Zvicër.

Në komitetin kundër iniciativës marrin pjesë përfaqësues të të gjitha partive tjera veç SVP/UDC dhe SP/PS-së. Kjo e fundit nuk i është bashkuar komitetit pasi që konsideron se fushata kundër iniciativës të SVP-së është “tepër e butë”.

Kështu, në konferencën e sotme janë prezantuar përfaqësues të FDP/PLR, CVP/PDC, BDP, GLP, të Gjelbrit dhe EVP. Ata së bashku kanë sqaruar se për cilat arsye populli duhet ta hedhë poshtë iniciativën më 9 shtator. Sipas tyre kjo iniciativë nuk është zgjidhje për problemet ekzistuese, ndërsa për disa nga ecuritë negative në atë drejtim ekzistojnë qysh tash kundërmasat.

Komiteti ka vënë në pah se iniciativa i shkakton dëm Zvicrës. Vendi ka interes të ketë marrëdhënie të mira tregtare me Bashkimin Evropian. Ndërsa vënia e kontingjenteve nuk zgjidh asnjërin nga problemet që lidhen me migracionin.

Në emrin e komitetit, kryetari i CVP/PDC-së, Christophe Darbellay ka thënë se votimi për “Iniciativën kundër migracionit masiv” është më i rëndësishmi në këtë legjislaturë. Sepse, sipas tij, “vihet në lojë qasja e Zvicrës në një treg prej 500 milionë banorësh”, shkruan srf.ch

Ndërsa për kryetarin e FDP/PLR-së, Philipp Mïller, iniciativa është “lojë me zjarrin”. Mirëqenia në Zvicër lidhet në masë të madhe e këmbimet ekonomike që ajo ka me BE-në. Nga këto këmbime varet çdo i treti vend i punës në ekonominë Zvicerane.