AUTOTECH

Irlanda do të ndalojë shitjen e veturave me benzinë dhe naftë

Qeveria irlandeze njoftoi projektin e saj për të ndaluar shitjen e automjeteve me benzinë dhe naftë deri në 2030-ën, në kuadër të masave të hartuara për mbrojtjen e mjedisit.

Dublini parashikon që deri atëherë 950.000 makina elektrike do të lëvizin në rrugët irlandeze. Qeveria synon të zhvillojë një rrjet pikash për furnizimin me energji elektrike, që do të mundësojnë furnizimin e automjeteve të reja në gjithë vendin.

“Ky njoftim u prezantua të hënën në mbrëmje nga kryeministri irlandez, Leo Varadkar. Kjo nismë vjen në kuadër të planit të veprimit për klimën që përfshin 180 masa për bizneset, ndërtimin, transportet, bujqësinë apo më tej menaxhimin e mbetjeve. Plani synon të arrijë objektivat e Dublinit në aspektin e emetimeve të gazit me efekt serrë për 2030 dhe për ta vendosur Irlandën në rrugën e duhur për të arritur emetimet zero të dioksidit të karbonit deri më 2050”, thuhet në një komunikatë për shtyp të qeverisë./ATSH/