Mustafa kërkoi nga presidenti të heqë dorë nga korrigjimi i kufijve

Kryetari i LDK-së, Isa Mustafa, ka konfirmuar takimin që pati me presidentin Hashim Thaçi, në shtëpinë e tij. 

Në një postim në Facebook, Mustafa ka shkruar se si kryetar i partisë më të madhe politike është informuar për kërkesat, por edhe paralajmërimet për masa shumë serioze ndaj Kosovës, të deklaruara nga delegacioni i lartë i SHBA-së. 

“Ia shpreha brengosjen time dhe të LDK-së për situatën, në të cilën koalicioni qeverisës e ka sjellë vendin. Kërkova nga Presidenti që të heqë dorë nga orientimi i tij dhe diskursi politik për korrigjim të kufijve, në mënyrë që të krijohet një ambient normal për dialog dhe të evitohet frika nga dialogu”, ka shkruar Mustafa. 

Kreu i LDK-së ka shtuar se partia e tij nuk do të pajtohet në asnjë mënyrë që të dialogohet për territorin, sepse kjo çon në rihapje të shtetësisë. Mustafa ka thënë se është i gatshëm të takohet me secilin kur është fjala për interesin e shtetit dhe partneriteti me SHBA-në. 

“LDK-ja nuk është parti diskomunikuese, nuk frikësohemi nga takimet, sepse u qëndrojmë besnikë zotimeve tona politike”, ka përfunduar ai.