“John McCain, ishte mik i shqiptarëve”

Hashim Thaçi, Ramush Haradinaj, Kadri Veseli, Ilir Meta e Edi Rama, ishin ndër politikanët shqiptarë që kanë kujtuar senatorin amerikan, John McCain, i cili ndërroi jetë

Presidenti i Kosovës, Hashim Thaçi ka shprehur ngushëllimet e tij në emër të popullit të Kosovës me rastin e vdekjes së mikut të madh të shqiptarëve, senatorit amerikan John McCain.

Në një reagim të tij përmes llogarisë së tij në Twitter, presidenti Thaçi e ka cilësuar hero senatorin amerikan, ndërsa ka shfaqur ndjenjë pikëllimi për humbjen e tij.

“Një nga udhëtimet e tij jashtë vendit ishte ai i vitit 2017 në Kosovë, kur unë i dhashë atij urdhrin më të lartë të meritës. Ai ishte një ndër heronjtë e fundit të vërtetë të kohës sonë”.

Kryeministri i Kosovës, Ramush Haradinaj, është rikthyer në kohë duke kujtuar takimin e tij të parë me senatorin amerikan, John McCain, i cili ndërroi jetë në mbrëmjen e së shtunës.

Haradinaj përmes Facebook, ka treguar madje edhe për bisedën e tij të parë që pati me McCain, e cila kishte ndodhur saktësisht në vitin 1999-të, përcjell albinfo.ch.

“Asnjëherë nuk do ta harroj takimin e parë me heroin e ShBA-së, senatorin John McCain, në vitin 1999. Me brengat për humbjet që sjell lufta, pata mbetur i shtangur kur heroi amerikan më pyeti posa më pa: “What can I do for you young man?

Ndonëse i habitur nga pyetja aq e drejtpërdrejt, i kërkova ndihmë në lirimin e shqiptarëve që ende mbaheshin të burgosur në Serbi dhe kjo ishte tema e parë e takimeve të tij me zyrtarët serbë.

Ishte privilegj të takosh një njeri të madh si McCain. Populli i Kosovës është me mendje pranë mikut amerikan dhe i bashkohet në lutje familjes së tij”.

Kryetari i Kuvendit të Kosovës, Kadri Veseli është shprehur i pikëlluar pas vdekjes së senatorit amerikan.

“Vitin e kaluar në Kuvendin e Kosovës kishim nderin të presim senatorin John McCain, mikun e madh të lirisë dhe pavarësisë sonë. I ruaj të paharrueshme mbresat e veçanta nga takimi me të. Një mendje briliante që me pak fraza zbërthente edhe problemet më komplekse të kohës sonë. Kosova ka qenë e bekuar duke pasur miq të tillë si senatorin McCain. Vdekja e tij na ka pikëlluar të gjitheve. Prehu në paqe miku ynë i madh e i paharruar”, tha më tej Veseli.

Presidenti i Shqipërisë, Ilir Meta, ka ndarë një reagim pikëllues me rastin e ndarjes nga jeta të senatorit amerikan John McCain.

Meta e ka quajtur hero lufte dhe patriot të madh senatorin McCain, ndërsa ka potencuar se i shërbeu kombit të tij me vetëmohim e ndershmëri.

Veç tjerash përmes llogarisë së tij në Facebook, ai ka theksuar dhe mbështetjen e pashoq të John McCain në çështjet e Kosovës për lirinë dhe pavarësinë e po ashtu dhe në çështjen e anëtarsmit të Shqipërisë në NATO:

Edhe kryeministri i Shqipërisë, Edi Rama, ka kujtuar senatorin amerikan, duke thënë se ishte mik i shqiptarëve.

---