Ka vuajtur dënimin në Zvicër, e dëbojnë në Kosovë

Dëbimi është realizuar menjëherë pas përfundimit të masës së kujdestarisë dhe ka rrjedhur pa asnjë problem, njofton policia.

Shërbimi për Migracion i Kantonit të Bernës në bashkëveprim me Policinë Kantonale Bernë, ka dëbuar për në vendin e prejardhjes një delinkuent kosovar pasi që ka vuajtur dënimin në Zvicër. Personit në fjalë Shërbimi për Migracion i Kantonit të Bernës ia kishte mohuar të drejtën e qëndrimit në Zvicër pasi që kishte pasur një dënim penal dhe për një kohë të gjatë kishte jetuar i varur nga ndihmat sociale.

Kosovari kishte ushtruar ankesë e cila i ishte hedhur poshtë në  gusht të vitit 2006. Ndërsa në maj të vitit 2006 Gjykata e Qarkut VIII Bern-Laupen i kishte shqiptuar atij një masë ndëshkuese të kujdestarisë për kohë të pacaktuar.

Me këto masa, personi në fjalë ka plotësuar kushtet për t`u dëbuar nga Zvicra, ka konstatuar shërbimi për migracion, i cili bashkë me shërbimin për të huaj në kuadrin e policisë së Kantonit të Bernës e ka ekzekutuar vendimin për dëbim.

Dëbimi është realizuar menjëherë pas përfundimit të vuajtjes së dënimit, gjegjësisht masës së kujdestarisë dhe ka rrjedhur pa asnjë problem, njofton policia.

Njëkohësisht me dëbimin, kosovarit i është shqiptuar ndalesa e hyrjes në Zvicër për kohë të pacaktuar.