Kapet autobusi kosovar i udhëtarëve, i ngarkuar me mallra si një kamion

Nga kontrolli i realizuar, policët gjetën aty objekte të pazakonshme si cisterna uji, karrige të kopshtit, bashkë me një tavolinë dhe një lavatriçe

Në mbrëmjen e të shtunës rreth orës 21, në autostradën A8 të Gjermanisë, policia ka ndaluar një autobus për ta kontrolluar. Autobusi kishte 28 udhëtarë por ajo që u ra në sy policëve ishte fakti se në të kishte jashtëzakonisht shumë gjësende të paketuara. Kjo e bënte autobusin t`i ngjante më shumë një automjeti për transportim mallrash se sa udhëtarësh, thuhet në një komunikatë të Policisë Federale të Gjermanisë.

Nga kontrolli i realizuar, policët gjetën aty objekte të pazakonshme si cisterna uji, karrige të kopshtit, bashkë me një tavolinë dhe një lavatriçe! Nisur nga fakti se autobusi nuk kishte leje për transportim mallrash, ndaj kompanisë përgjegjëse është ushtruar kallëzim penal, transmeton albinfo.ch. Mbi këtë bazë, shoferi i autobusit është detyruar të paguajë disa qindra euro në emër të depozitimit.

Me rastin e kontrollimit të detajuar, policët kanë konstatuar se një shtetas shqiptar i pranishëm në autobus, ishte i kërkuar me fletarrest. Ai gjatë vitit 2016 kishte kryer një numër vjedhjesh në Osnabrück. Por pasi që ai pastaj nuk ishte gjetur më në Gjermani, ndaj tij ishte shpallur fletarrest, përcjell albinfo.ch. I kapur tash në autobus, ai është detyruar të paguajë disa qindra euro dhe kështu ka shmangur arrestimin, duke vazhduar rrugën me autobus drejt Shqipërisë.

Për një tjetër shtetas shqiptar të kapur në autobus, u konstatua se ishte i kërkuar nga autoritetet italiane. Dokumentet e gjetura te 27 vjeçari, iu dorëzuan për verifikim autoriteteve italiane. Ndërkohë, pasi që ndaj tij ishte shpallur ndalesa për hyrje në zonën e Shengenit, edhe ndaj tij janë marrë masat e duhura për përfundimin e qëndrimit në Gjermani.