Kështjella në Gjermani që do të konkurrojë për statusin e UNESCO-s

Ilustrim, Pixabay

Gjermania do të paraqesë aplikimin e saj për kështjellën ikonike të shekullit të 19-të, si vend i ardhshëm i Trashëgimisë Botërore, pasi 56% e banorëve në qytetin përreth votuan për ta bërë këtë.

Banorët në qytetin Schwangau në Gjermaninë jugore votuan të dielën në favor të përcaktimit të kështjellës Neuschwanstein si një vend i Trashëgimisë Botërore të UNESCO-s.

E hapur për publikun në 1886, Kalaja Neuschwanstein është një nga atraksionet turistike më të njohura të Gjermanisë sot, me rreth 1.4 milionë vizitorë në vit, shkruan DW.

Gjatë verës, kështjella ka rreth 6,000 vizitorë çdo ditë, me urën e afërt Marienbrücke që shërben gjithashtu si një ndalesë për turistët dhe alpinistët, pasi ofron pamje mbresëlënëse të kështjellës dhe maleve përreth.

Meqenëse UNESCO kërkon mbështetjen e banorëve për të shqyrtuar një aplikim për Trashëgimi Botërore, vota e qytetit do të thotë se Gjermania tani mund të paraqesë ofertën në Paris në fillim të vitit 2024, përcjell albinfo.ch.

Kryetari i bashkisë Schwangau, Stefan Rinke tha se rreth 56% e votuesve e mbështetën ofertën, ndërsa rreth 44% ishin kundër.

“Ne jemi të lumtur për referendumin. Kjo na jep një mandat të qartë nga populli për të mbështetur aktivisht nismën shtetërore”, u shpreh Rinke.

UNESCO do të shpallë një vendim për aplikimin gjerman diku nga mesi i vitit 2025. Gjermania aktualisht ka rreth 51 vende me përcaktimin e Trashëgimisë Botërore.

Ndërtimi në kështjellën Neuschwanstein filloi në vitin 1869. Pavarësisht nga popullariteti i saj i madh sot, mbreti bavarez Ludwig II e kishte ndërtuar atë si një strehë për veten e tij, si një vend për t’u tërhequr nga jeta publike.

Kalaja ikonike thuhet gjithashtu se ka shërbyer si frymëzim për Kalanë e Hirushes së Walt Disney, e cila është simboli kryesor i markës së Disney-t, përcjell albinfo.ch.