Kishte lënë Zvicrën për Kosovën, Loriana Kuka po shkëlqen në xhudo

Loriana Kuka para dy vitesh ishte vendosur në Pejë, duke lënë Zvicrën, derisa tashmë u shpall kampione e Evropës U-23

Një numër i madh i sportistëve zgjedhin kushtet më të mira, vendet ku kanë lindur e jetuar, dhe interesin personal para se gjithash.

Por, Loriana Kuka, e rritur në Zvicër, ka vendosur të përfaqësojë Kosovën në xhudo, shkruan albinfo.ch.

Loriana është mbesa e Driton Kukës, përzgjedhësit të Kosovës në xhudo, i cili gjithashtu është trajner i Majlinda Kelmendit, Nora Gjakovës, Distria Krasniqit, Akil Gjakovës e shumë xhudistëve tjerë të suksesshëm.

Së fundi, Loriana fitoi medaljen e artë në Kampionatin Evropian U-23. Kjo e bëri shumë të lumtur trajnerin Kuka. “E veçantë kjo medalje për mua, për familjen Kuka, për vëllain tim Sylën, që e kam pas trajner dhe udhërrëfyes në jetë! Loriana la Zvicrën për Kosovën, erdhi para dy vitesh dhe u vendos në Pejë për të rritur paraqitjen, por edhe për ta përfaqësuar vendin e familjes së saj! Medalja e parë nga një Kampionat Evropian për dikë nga familja jonë! Shumë i lumtur për këtë medalje!”, ka shkruar Kuka në rrjetet sociale.

---