Komunat i mirëpresin masat e reja, bëhen gati për pritjen e mërgatës

Ilustrim Foto: Arben Llapashtica

Asociacioni i Komunave të Kosovës i ka mirëpritur masat e reja anti-Covid, të miratuara nga Qeveria e Kosovës në mbledhjen e së premtes.

Këtë e ka thënë drejtori i AKK-së, Sazan Ibrahimi.

“Komunat i kanë mirëpritur masat anti-Covid të miratuara nga Qeveria e Kosovës. Në takimin e fundit që kemi pasur me ministrin e Shëndetësisë, Arben Vitia, jemi dakorduar që të ketë lehtësim të masave. Po ashtu jemi dakorduar që të ketë lehtësira që kanë ndikim në zhvillim ekonomik lokal“, ka deklaruar Ibrahimi.

Ibrahimi deklaroi se komunat po bëjnë përgatitje për pritjen e mërgatës.

Ndryshe, Qeveria e Kosovës në mbledhjen e të premtes ka miratuar masat e reja anti-Covid, të cilat do të hyjnë në fuqi nga kjo e hënë.

Orari i gastronomisë është zgjatur deri në orën 23:00, ora policore është larguar, por ka hyrë në fuqi vendimi që pas orës 00:00 deri në orën 05:00 të mos ketë grumbullime të qytetarëve.

Po ashtu, Qeveria ka marrë vendim që të lejohet mosbartja e maskës gjatë kohës kur një qytetar ec i vetëm në rrugë.