Lajme

Koronavirusi në Zvicër me trend rënieje: 782 raste në tri ditët e fundit

Që nga java e parafundit, BAG nuk bën më raportimin e rasteve gjatë fundjavës, por ato i raporton të përmbledhura, të hënën

Zyra Federale e Shëndetit Publik ka raportuar 782 raste të reja infeksionesh me koronavirus në tri ditët e fundit, shkruan srf.ch.

Siç është njoftuar tashmë, që nga java e parafundit, BAG nuk bën më raportimin e rasteve gjatë fundjavës, shkruan albinfo.ch. Kështu, numri i publikuar të hënën  (sot) përfshin regjistrimet nga fundjava dhe raste individuale të mbetura pa u regjistruar gjatë javës së kaluar.

Mesatarja e rasteve të 7 ditëve të fundit  është 335 që është 20 për qind më pak se në javën e kaluar. Prandaj, trendi i infeksioneve është në rënie.

Shkalla mesatare 7 ditore e rezultateve pozitive të testimeve aktualisht është 3.8 për qind. Kjo do të thotë se nga 100 teste, mesatarisht 4 teste ishin pozitive.

Numri mesatar i testimeve të bëra në 7 ditët e fundit është 10,132 teste në ditë, që është 19 për qind më e ulët se një javë më parë.

BAG raporton 2 raste të reja të vdekjes nga Covid-19 që kanë ndodhur gjatë periudhës së përmendur, përcjell albinfo.ch. Numri i pranimeve në spital gjatë 7 ditëve të fundit ka qenë 8 persona në ditë dhe kjo është 32 për qind më pak se në javën e kaluar.