Kosova në kualifikime për Kampionatin Botëror

UEFA ka vendosur rreth fatit të përfaqësueses së Kosovës për eliminatoret e Botërorit “Rusia 2018”. Kosova do të jetë pjesë e Grupit I gjatë kualifikimeve për Botërorin e vitit 2018. Pra, Kosova do të bëjë pjesë në grupin ku bën pjesë Kroacia, Islanda, Ukraina, Turqia dhe Finlanda, shkruan albinfo.ch.

Me Finlandën, Kosova pritet të luajë edhe ndeshjen e parë të eliminatorëve për Botërorin e ardhshëm, që mbahet në Rusi. Kujtojmë se muaj më parë Federata e Futbollit e Kosovës është pranuar me të drejta të plota në FIFA dhe UEFA. Vlen të ceket se ditë më parë përfaqësuesja e Kosovës triumfoi kundër Ishujve Faroe me rezultat 2:0, duke shënuar fitoren e parë pas pranimit me të drejta të plota në federatat ndërkombëtare të futbollit.

Pasi u mësua që Kosova do të luajë në Grupin I kualifikues për Botërorin “Rusia 2018”, është mësuar edhe orari i ndeshjeve që do të zhvillohen në vitin 2016. Më 5 shtator, Kosova do të luajë takimin e parë në kuadër të kualifikimeve, si mysafir i Finlandës. Ndeshja e parë vendas, do të luhet më 6 tetor ndaj Kroacisë. Takimi i tretë i Kosovës do të luhet më 9 tetor ndaj Ukrainës, ndërsa një muaj më vonë, më 12 nëntor, Kosova luan ndaj Turqisë. Pas ndeshjeve të 12 nëntorit, Kosova nuk do të ketë orar të caktuar deri në mars të vitit 2017.