Kosova

Kosovë: Bastisen disa “Call centers”, po hetohen për mashtrim

Pas lajmit se Policia e Kosovës, në bashkëpunim me atë gjermane po kryejnë një aksion të përbashkët në Prishtinë dhe Ferizaj, Prokuroria Speciale ka dhënë më shumë detaje.

Sipas një komunikate, PS e Kosovës ka njoftuar se bastisjet po kryhen nëpër qendrat e quajtura “Call center”, përcjell albinfo.ch.

Sipas njoftimit, ky aksion po kryehet në bashkëpunim me prokurorinë gjermane te Landit Saarland. “Prokuroria e Landit Saarland të Gjermanisë ka filluar hetimet në drejtim të veprës penale “Mashtrim” të Kodit Penal gjerman dhe aksioni është duke u zhvilluar në disa shtete të Evropës, pjesë e së cilës është edhe Kosova”, thuhet në njoftim.

Njoftimi i plotë nga prokuroria:

Prokuroria Speciale e Republikës së Kosovës njofton opinionin se në bazë të kërkesës për Ndihmë Juridike Ndërkombëtare, Prokuroria Gjermane e Landit Saarland, bashkarisht me Prokurorinë Speciale të Republikës së Kosovës, janë duke kryer bastisje në disa qendra të quajtura “Call center” në qytetin e Prishtinës dhe të  Ferizajt, me qëllim të zbulimit të fakteve dhe provave për vepra të mundshme penale.

Prokuroria e Landit Saarland të Gjermanisë ka filluar hetimet në drejtim të veprës penale “Mashtrim” të Kodit Penal gjerman, dhe aksioni është duke u zhvilluar në disa shtete të Evropës, pjesë e së cilës është edhe Kosova.

Po ashtu, Prokuroria Speciale e Kosovës, njofton se nëse zbulohen faktet konkrete do të fillojë hetimet ndaj pronarëve të këtyre qendrave në territorin e Republikës së Kosovës, në drejtim të veprës penale “Shpëlarje parash”.

Për detaje më të hollësishme do të njoftoheni pas përfundimit të operacionit gjatë ditëve në vijim.

Lexo edhe:

Policia e Kosovës dhe ajo e Gjermanisë, me aksion kundër pastrimit të parave