“KOSOVË IS EVERYWHERE”, hap festivalin letrar “Wortlaut”

Premiera është në St.Gallen, më 23 mars, në kuadrin e aktivitetit të hapjes së Festivalit të Dhjetë të Letërsisë "Wortlaut" që mbahet në këtë qytet

“Bern ist überall” (Berna është kudo) mban emrin një grup prej 12 shkrimtarësh dhe muzicientësh zviceranë të cilët preokupohen me fjalën e folur, pastaj bëjnë lidhjen e letërsisë gojore me muzikën dhe të gjitha këto i vendosin në skenë.

Me projektin “KOSOVË IS EVERYWHERE”, ky kolektiv artistësh ka vendosur të punojë bashkë me artistë të fjalës dhe muzicientë në Kosovë. Pas shtatë shfaqjeve të dhëna në Kosovë tash vjen “Le retour” (vizita e kthimit), ose shtatë shfaqje të përbashkëta në Zvicër, shkruan albinfo.ch.

Premiera është në St.Gallen, në kuadrin e aktivitetit të hapjes së Festivalit të Dhjetë të Letërsisë që mbahet në këtë qytet. Nga Zvicra, pjesë e këtij aktiviteti artistik janë: Laurence Boissier, Guy Krneta dhe Gerhard Meister ndërsa nga Kosova: Sibel Halimi, Jeton Naziraj dhe Shpëtim Selmani, njofton albinfo.ch. Ata përkthejnë njëri-tjetrin, flasin në kor ose i interpretojnë tekstet e tyre në mënyrë ritmike dhe me shoqërim muzikor nga Adi Blum dhe Drin Tashi. E gjitha do të shfaqet me tritrim në gjuhën gjermane.

Festivali fillon më 23 mars ndërsa “KOSOVË IS EVERYWHERE” bën hapjen e tij, në orën 19.00.

Grupi do të jetë pjesë edhe e disa aktiviteteve artistike në ditët dhe muajt në vijim, si: në Bernë, më 4 prill, ku ai e bën hapjen e festivalit “Aprillen”, në Lucern më 9 maj në festivalin “Woerdz”, në Solothurn më 11 maj në “Solothurner Literaturtagen”, në Bernë më 9 qershor në “Botanik & Poesie“ dhe renens më 16 qershor në „Festimixx, Renens“

St. Galler Literaturtage Wortlaut Notkerstrasse 229000 St. Gallen Tel. 071 222 66 26