Kosovë: Mbi 38 mijë lodra të pasigurta të konfiskuara, kërcënim për fëmijët

Inspektorati Qendror i Mbikëqyrjes së Tregut (IQMT) ka realizuar një kontroll të gjerë në tregun e lodrave, duke ndaluar më shumë se 38 mijë lodra që nuk plotësonin kriteret e sigurisë. Vlera e tyre arrin rreth 100 mijë euro, ndërsa rreziku për shëndetin e fëmijëve konsiderohet i lartë.

Gjatë këtij viti, IQMT ka kryer inspektime të shumta si në zonat doganore, ashtu edhe në tregun lokal, duke verifikuar mbi 50 subjekte tregtare. Lodrat e konfiskuara janë kthyer në vendet e origjinës.

Qëllimi i këtij aksioni është të sigurohet që produktet në treg të jenë të sigurta dhe të përputhshme me standardet ligjore, duke mbrojtur shëndetin dhe mirëqenien e qytetarëve. Sipas rregulloreve të Bashkimit Evropian, lodrat duhet të kenë shenjën CE, që garanton përputhshmërinë me kriteret europiane për sigurinë dhe mbrojtjen e mjedisit.

Inspektimet e kryera në disa dyqane dhe tregun e gjelbër në Prishtinë treguan se shumë lodra nuk kishin shenjën CE dhe mungonte informacioni mbi origjinën dhe përmbajtjen e tyre, ndërsa dyqanet më të mëdha kishin dokumentacionin e nevojshëm.

“Me numrin e kufizuar të inspektorëve, rrjedhja e kontrabandës është e kuptueshme, veçanërisht me lodra që mund të jenë edhe të rrezikshme ose kancerogjene. Kontrolli parandalues duhet të forcohet, pasi lodrat e importuara nga Kina ose vende të tjera mund të dëmtojnë shëndetin e fëmijëve”, tha Lulzim Beqiri, ekspert i ekonomisë.

Çmimet e lodrave të importuara shpesh fillojnë nga vetëm 1 euro, dhe mungesa e informacionit mbi përmbajtjen dhe origjinën rrit rrezikun për konsumatorët më të rinj.