Kosovë, në mesjavë shpallen rezultatet përfundimtare të zgjedhjeve

Zëdhënësi i KQZ-së, Valmir Elezi thotë se pas përfundimit të numërimit, kandidatët nga subjektet politike do të mund t’i drejtohen Panelit Zgjedhor për Ankesa dhe Parashtresa, nëse kanë ndonjë ankesë rreth rezultatit zgjedhor

Komisioni Qendror i Zgjedhjeve të mërkurën pritet ta përfundojë procesin e numërimit të votave me kusht dhe votave të personave me nevoja të veçanta nga zgjedhjet lokale të 22 tetorit, dhe pas kësaj të dal me rezultatet përfundimtare të zgjedhjeve. Zëdhënësi i KQZ-së, Valmir Elezi, thotë se pas përfundimit të numërimit, kandidatët nga subjektet politike do të mund t’i drejtohen Panelit Zgjedhor për Ankesa dhe Parashtresa, nëse kanë ndonjë ankesë rreth rezultatit zgjedhor.

“Pas numërimit të votave me kusht dhe votave të personave me nevoja të veçanta, KQZ-ja do t’i shpallë rezultatet përfundimtare për kryetar komune. Po besojmë se në mesjavë do të arrijmë t’i shpallim këto rezultate. Pas shpalljes së këtyre rezultateve përfundimtare, subjektet politike dhe kandidatët mund të bëjnë ankesat e tyre në institucionet përkatëse lidhur me rezultatet e shpallura”, tha Elezi për rtk.

Por, palët kanë bërë ankesa ende pa përfunduar procesi i numërimit.

Kandidatët të cilët kanë bërë ankesa të cilat lidhen ekskluzivisht  me rezultatin e zgjedhjeve, duhet t’i përsërisin ato.

Kryesuesi i Panelit Zgjedhor për Ankesa dhe Parashtresa, Mulë Desku tha se nga 252 ankesa të paraqitura, 213 prej tyre kanë të bëjnë me pretendimet rreth parregullsive në numërim, prandaj, palët duhet t’i përsërisin këto ankesa pasi QNR- të përfundojë numërimin.

“Të gjitha këto ankesa janë shqyrtuar dhe paneli ka marrë vendim për këto ankesa. Mirëpo, kjo nuk ka qenë koha e duhur e paraqitjes së këtyre ankesave, kështu që të gjithë ata kandidatë për anëtarë të kuvendeve komunale të cilët kanë paraqitur ankesa dhe janë njoftuar me vendimin, pjesa më e madhe janë njoftuar por edhe ata që s’janë njoftuar, me rastin e publikimit të rezultateve nga ana e KQZ-së, duhet të bëjnë ankesë  përsëri  që t’i atakojnë në një farë mënyrë këto parregullsi, sepse ato janë rezultate zyrtare dhe duhet të paraqiten pretendimet, dëshmitë”, deklaroi Desku.