Krerët e institucioneve bëjnë homazhe për Ditën e Dëshmorëve të Prishtinës

Homazhe pranë shtatores së Zahir Pajazitit dhe në Kompleksin e Varrezave të Dëshmorëve në Velani

Me rastin e 18 prillit – Ditës së Dëshmorëve të Komunës së Prishtinës, krerë të institucioneve shtetërore kanë bërë homazhe në kryeqytet, pranë shtatores së heroit Zahir Pajaziti.

Në ceremoninë përkujtimore morën pjesë ushtruesja e detyrës së Presidentes së Republikës së Kosovës dhe njëherësh kryetarja e Kuvendit, Albulena Haxhiu, ministri i Shëndetësisë Arben Vitia, si dhe ministri i Mbrojtjes Ejup Maqedonci.

Haxhiu theksoi rëndësinë e figurës së Zahir Pajazitit dhe bashkëluftëtarëve të tij, duke vlerësuar kontributin e tyre në organizimin e rezistencës dhe në frymëzimin e të rinjve për t’iu bashkuar Ushtrisë Çlirimtare të Kosovës.

“Sot nderojmë jetën dhe veprën e heroit tonë Zahir Pajazitit, gjithë dëshmorëve të Prishtinës dhe gjithë dëshmorëve të kombit. Kontributi i tyre është arsyeja pse sot jetojmë në një shtet të lirë dhe të pavarur”, u shpreh Haxhiu.

Homazhe bëri edhe kryetari i Komunës së Prishtinës, Përparim Rama, i shoqëruar nga bashkëpunëtorë, komandantë dhe familjarë të dëshmorëve. Ai vizitoi Kompleksin e Varrezave të Dëshmorëve në Velani, duke theksuar se sakrifica e tyre është themeli i paqes, lirisë dhe demokracisë që gëzon sot Kosova.

Në aktivitet morën pjesë edhe ministri për Punë, Familje dhe Vlerat e UÇK-së, Andin Hoti, i cili kërkoi që të dokumentohen krimet e luftës dhe të kërkohet drejtësi për të rënët. Ndërsa ministri Maqedonci u shpreh se Kosova po ecën në drejtimin e duhur në forcimin e ushtrisë, duke u mbështetur në themelet e UÇK-së dhe sakrificën për liri.

Në homazhe morën pjesë edhe deputetë dhe përfaqësues të Partisë Demokratike të Kosovës. Deputetja Vlora Çitaku tha se liria e Kosovës ka ardhur me një çmim të lartë dhe se kujtimi i dëshmorëve mbetet udhërrëfyes për të ardhmen e vendit.

---