Kriza politike sjell komisionarin Han dhe tre eurodeputetë në Shkup

Për të lehtësuar zgjidhjen e krizës, sot në Shkup do të qëndrojë eurokomisari, Johannes Hahn, së bashku me tre eurodeputetët Ivo Vajgrll, Eduard Kukan dhe Knut Flekenshtajn

Ngërçi politik në Maqedoni dhe mos koordinimi për formimin e qeverisë së re, ka nxitur reagime në Bashkimin Evropian. Për të lehtësuar zgjidhjen e krizës, sot në Shkup do të qëndrojë eurokomisari për negociata dhe zgjedhim i BE-së, Johannes Hahn, së bashku me tre eurodeputetët Ivo Vajgrll, Eduard Kukan dhe Knut Flekenshtajn.
Zëdhënësja e Komisionit Evropian, Maja Kocijançiç, paralajmëroi se Han dhe treshja e eurodeputetëve përveç me liderët e partive politike, në Shkup do të takohen edhe me presidentin Gjorge Ivanov dhe liderët tjerë politikë.

Katërshja evropiane do të përsërisin në Shkup qëndrimin e BE-së për respektim të epilogut të zgjedhjeve dhe të lejohet vazhdimi i proceseve demokratike për formim të shpejtë të qeverisë së orientuar reformiste, e cila do të vazhdojë me implementimin e marrëveshjes së Përzhinos.

Kjo është vizita e dytë e eurokomisarit Hahn në Maqedoni pas zgjedhjeve parlamentare të mbajtura më 11 dhjetor. Në fillim të shkurtit në Shkup pati takime me presidentin e vendit Ivnaov, dhe me liderët e partive të përfaqësuara në Parlament.

Pas takimeve, porositi se pret nga liderët partiak të demonstrojnë pjekuri dhe të sjellin vendim në interes të qytetarëve dhe perspektivës evropiane të vendit, citon AlsatM.

“Dukshëm nevojitet kohë. Ata do të vazhdojnë me negociata dhe pres të sjellin vendim në interes të vendit, të qytetarëve dhe të perspektivës evropiane. BE-ja do të bëjë gjithçka për t’i ndihmuar vendit dhe udhëheqësish së tij”, deklaroi atëherë Johannes Hahn.

Në anën tjetër, presidenti maqedonas Gjorge Ivanov vazhdon të qëndroj kundër dhënies së mandatit për liderin opozitar Zoran Zaev. Shkak, sipas tij, mbetet platforma shqiptare që, sipas tij, bie ndesh me kushtetutën e Maqedonisë. “Disa kërkesa të partive politike shqiptare janë në kundërshtim me kushtetutën e Maqedonisë dhe nuk kanë të bëjnë me situatën reale në Maqedoni”, ka thënë ai.