Kryeministri i Kosovës: Nuk do ta pranoja vetëm draftin, pa pakon e plotë

Kryeministri i Kosovës, Albin Kurti, para deputetëve në Kuvend, ka deklaruar se nëse në Bruksel do t’i ofrohej vetëm nënshkrimi i draftstatutit për Asociacionin, nuk do ta pranonte, teksa tha se e ka pranuar draftin e Asociacionin si pjesë të një pakete, ku përfshihet edhe Marrëveshja Bazë dhe Aneksi i Zbatimit.

Sipas tij, kjo i ishte kërkuar si “urgjencë e madhe për shkak të situatës gjeopolitike” nga krerët evropianë, por edhe nga Shtetet e Bashkuara të Amerikës.

“Draftstatuti i propozuar i ka vërejtjet te ndërmjetësi. Unë kam pranuar nënshkrimin e paketës. Po të më thoshin pranoje veç draftstatuin, nuk do ta pranoja. Ata nuk kërkuan prej meje ta pranoj veç draftin, sepse nuk do të mund ta pranoja. Po si pjesë e paketës, kur të thonë krerët evropianë, me mbështetjen e SHBA-së, është urgjencë e madhe për shkak të situatës gjeopolitike, po e bëjmë sonte pra. A është ashtu? Edhe marrëveshja bazike, edhe aneksi i zbatimit, edhe ky draftstatut. Me ato vërejtjet e mia, po le të jetë aty. Por me nënshkrim. Pa nënshkrim, s’ka pranim. Pa nënshkrim, s’ka garanci për zbatim”, ka thënë ai, përcjell albinfo.ch.