Kthesë befasuese e rastit të familjes Ademaj

Vazhdon katrahura e një familje kosovare në Zvicër, e cila në shenjë proteste për trajtimin e saj nga komuna Burglen, në shtator të vitit të kaluar, kishte grumbulluar mbeturinat në oborrin e saj të shtëpisë ku banonte.

Tashmë dy muaj, ka skaduar afati për largimin e saj nga banesa e tyre, ndërsa pronari i banesës do të përpiqet që ta dëbojë me dhunë, për të zbatuar vendimin e Gjykatës së rrethit e cila ka vendosur që familja gjashtë anëtarëshe e Murtez Ademajt, të largohet nga kjo komunë deri më 10 dhjetor të vitit të kaluar.

Kohë më parë, nga komuna kishin deklaruar se nuk janë në gjendje tu ofrojnë banesë tjetër, ndërsa është obligim i familjes që vetë të gjenden si të munden.

Duke marrë parasysh jehonën që kishte bërë familja në fjalë me grumbullimin e mbeturinave, është shumë e natyrshme që në Zvicër njeriu të mbetet nëpër rrugë, pasi tashmë rasti është bërë i njohur në tërë vendin dhe kjo familje ka një pasqyrë tepër negative në vend.

Kryetari i komunës Armin Eugster, kishte deklaruar se për familjen Ademaj do të jetë shumë vështirë të gjejë ndonjë banesë edhe po t’i plotësojëtë të gjitha kushtet e nevojshme.

Sipas mediave zvicerane të cilat kryefamiljarin Ademaj e quajnë “terrorist i mbeturinave”, kësaj familje nuk i mbetet gjë tjetër vetëm se të kthehet në Kosovë.

Por, tani si duket gjërat kanë ndryshuar, pasi kryetari i komunës Armin Eugster ka thënë: “Nuk dëshirojmë që zotëri Ademaj të na akuzojë se e kemi hedhur në rrugë”, duke cekur se komuna është duke kërkuar një banesë për familjen Ademaj, pas kthesës befasuese për rastin.

“Ne po mundohemi vetëm që të ndërmjetësojmë për të gjetur ndonjë zgjidhje. Për çiranë dhe banesën, kosovari personalisht duhet të marrë përgjegjësinë”, ka vazhduar Eugster, pas një qëndrimi të palëkundur negativ ndaj familjes kosovare.