Kuqezinjtë besojnë në fitore

Futbollistët kuqezi janë shprehur se mund të kalojnë këtë krizë që i ka kapluar dhe të shënojnë fitore në Izrael

Shqipëria nesër ka një test shumë të rëndësishëm, ku do të përballet me Izraelin si mysafire, shkruan albinfo.ch.

Futbollistët kuqezi janë shprehur se mund të kalojnë këtë krizë që i ka kapluar dhe të shënojnë fitore në Izrael.

Sulmuesi i Luganos, Armando Sadiku thotë se duhet të jenë agresivë në fushë dhe fitoret do të vijnë. “Kemi mundësinë më të mirë për të marrë sërish situatën në dorë. Një ekip si ne nuk mund ta pranojë kurrë humbjen me Luksemburgun, por pas saj kemi folur gjatë. Unë besoj se nuk ka asnjë faj trajneri në këtë aspekt, por çdo gjë na takon ne ta ndryshojmë. Na takon ne të reagojmë. Duhet të jemi dhe do te jemi shumë agresive në fushë”, theksoi Sadiku.

Edhe sulmuesi Sokol Cikalleshi beson në fitore. “Besoj se kemi humbur agresivitetin dhe këtë duhet ta rikthejmë. A do të shënoj në Izrael? Për mua rëndësi ka të fitojë skuadra, pastaj pak rëndësi ka nëse shënoj unë apo jo. Por gjithsesi, do të ishte dyfish kënaqësi të fitonim dhe të shënoja”, u shpreh Cikalleshi.