Kurti: LDK e ka pranuar koalicionin me ne, nesër flasim me Isa Mustafën e Vjosa Osmanin

Ai thotë se nuk do të diskutohet udhëheqja e Qeverisë

Kandidati i Lëvizjes Vetëvendosje, Albin Kurti, ka thënë se LDK’ja ka pranuar në parim të bëjë koalicion me të, por se nesër do të diskutojnë më shumë.

“Në parim kanë pranuar të kenë koalicion me ne. Do të marrim pjesë unë dhe profesori Besnik Bislimi dhe nga ana e tyre do të jenë profesor Isa Mustafa si kryetar i LDK’së dhe kandidatja e LDK’së, zonja Vjosa Osmani”, ka thënë Kurti në Klan të Shqipërisë.

Ai thotë se nuk do të diskutohet udhëheqja e Qeverisë, pasi sipas Kurtit, Gjykata Kushtetuese e Kosovës e ka sqaruar mirë se fituesit të zgjedhjeve i takon ta formojë dhe ta udhëheqë Qeverinë.

“Nuk do të jetë e diskutueshme, subjekti që del i pari e formon Qeverinë. Me vendimin e Gjykatës Kushtetuese, ose VV e drejton Qeverinë ose shkojmë serish në zgjedhje”, ka thënë Kurti, transmeton Gazeta Express.

Ai tutje shton se me LDK’në janë pajtuar shumë gjatë opozitarizmit e tash do të vazhdojë diskutimet për krjimin e një qeverie të përbashkët.

“Lidhja Demokratike e Kosovës dhe Lëvizja Vetëvendosje nuk janë një martesë e vështirë sic duket. 1 vit e gjysmë kemi pasur bashkëpunim shumë të mirë opozitar. Dhe tash kur e ke edhe verdiktin e popullit është edhe e obligueshme edhe racionale”, ka thënë lideri i VV’së.

Kurti thotë se me LDK’në ‘do të fillojnë me programin dhe projekte, e më pas për përgjegjësi dhe poste percjell Albinfo.ch.

---