Kurti uron Shqipërinë për hapjen e kapitullit të parë për negociatat për anëtarësim në BE

Zyra e kryeministrit

Kryeministri i Kosovës, Albin Kurti ka uruar Shqipërinë për hapjen e kapitullit për anëtarësimin në Bashkimin Evropian.

Ai thotë se i gëzohet arritjes së Shqipërisë.

“I gëzohemi fort kësaj arritjeje të Shqipërisë! Urime popullit dhe qeverisë shqiptare! U dëshiroj rrugëtim pa pengesa e progres të bazuar në meritokraci dhe përmbushje të reformave prej të cilave së pari përfitojnë qytetarët dhe vendi”, ka shkruar Kurti.

Tutje ka shtuar se nga ky rrugëtim do të përfitojë përvojë edhe Kosova.

“Bashkimin Evropian e kemi qëllim të përbashkët me Shqipërinë, jo vetëm si cak anëtarësimi, por edhe si vlerë e shoqërive tona demokratike, mirëqenie për qytetarët tanë dhe orientim i dy shteteve tona. Nga ky rrugëtim që Shqipëria po e nis sot pa dyshim që do të përfitojë edhe Kosova jonë në mësime dhe përvoja me të cilat i afrohemi edhe më shumë Shqipërisë e bashkë Bashkimit Evropian”, përfundon Kurti.

Shqipëria këtë të martë ka hapur kapitullin e parë të negociatave për anëtarësimin e saj në Bashkimin Evropian.