Kush merr dy vaksina të ndryshme të koronës, ka më shumë pasoja anësore

Megjithatë, kjo nuk përbën ndonjë shqetësim për sigurinë e pacientit, kanë theksuar shkencëtarët

Kushdo që merr dy vaksina të ndryshme kundër koronës, (në vaksinimin e parë dhe të dytë), ka më shumë mundësi të preket nga efektet anësore të lehta, pas dozës së dytë.

Kjo del nga të dhënat paraprake të një studimi të Universitetit të Oksfordit, i cili u botua të enjten në revistën e specializuar “The Lancet”, shkruajnë përkatësisht agjencitë  e lajmeve të Gjermanisë (dpa) dhe të Zvicërs (sda).

Megjithatë, kjo nuk përbën ndonjë shqetësim për sigurinë e pacientit, kanë theksuar shkencëtarët. Ende nuk mund të përcaktohet nëse kështu ndikohet reagimi imunitar, transmeton albinfo.ch. Të dhënat për këtë priten në muajt e ardhshëm.

Rastet që janë studiuar janë ato në të cilat është injektuar së pari vaksina Astrazeneca dhe pastaj vaksina Biontech / Pfizer ose anasjelltas, çdo katër javë. Në të dy rastet është shënuar rritje e incidencës së efekteve anësore të lehta dhe të moderuara.

“Rezultatet e këtij studimi sugjerojnë që dhënia e dy dozave të ndryshme çon në rritjen e mungesave në punë, ditën pas vaksinimit”, është shprehur Matthew Snape nga Universitetii i Oksfordit, i cili drejton studimin. Kjo është e rëndësishme për planifikimin e vaksinimeve për punonjësit në sektorin shëndetësor.

Për të arritur në këtë përfundim, janë ekzaminuar 830 vullnetarë mbi 50 vjeç, transmeton albinfo.ch. Ata, të ndarë në katër grupe, kanë marrë nga dy doza vaksinash të të njëjtit lloj dhe në një renditje tjetër, së pari njërën dhe më pas vaksinën tjetër.

Është e mundur që efektet anësore të jenë edhe më të zakonshme te njerëzit e rinj, thuhet më tutje në njoftim.

Në prill, studimi qe zgjeruar, duke përfshirë variante të tjera me vaksinat Moderna dhe Novavax si dozë e dytë pas vaksinimit fillestar me Astrazeneca ose Biontech / Pfizer, përcjell albinfo.ch. Rezultatet janë akoma në pritje.

---