Lajçak bisedon me Vuçiqin për dialogun Kosovë- Serbi

Përfaqësuesi i posaçëm i Bashkimit Evropian për dialogun Kosovë-Serbi, Miroslav Lajçak, përmes një njoftimi në rrjetin social në ‘Twitter” thotë se ka biseduar me presidentin e Serbisë, Aleksandar Vuçiq, mbi pritshmëritë e tij nga procesi i bisedimeve.

Ai është caktuar nga BE-ja si fasilitues i dialogut Kosovë-Serbi. Siç dihet, tashmë dialogu ka më shumë se dy vjet që pothuajse ka ngecur. SHBA në njëren anë dhe Bashkimi Evropian, në anën tjetër, janë duke bërë përpjekje që të marrë një epilog ky dialog me një marrëveshje përfundimtare mes të dy vendeve.

“Bisedova me presidentin e Serbisë Aleksandar Vuçiq, me të cilin pata një bisedë konstruktive mbi pritshmëritë nga dialogu, për përgjigjen ndaj COVID-19 dhe asistencës së BE-së për këtë, si dhe për ekonominë. Mezi pres që të punoj së bashku me partnerët e mi, për të gjithë njerëzit në Ballkanin Perëndimor”, ka shkruar Lajçak në llogarinë e tij në Twitter.