Kosova

LDK-ja paralajmëron mocion për Qeverinë Haradinaj

Lidhja Demokratike e Kosovës ka paralajmëruar mocion për qeverinë Haradinaj.

Kryetari i LDK-së, Isa Mustafa, ka mbledhur në takim deputetët e grupit parlamentar të kësaj partie.

Mbledhja është mbajtur me dyer të mbyllura, ndërkaq nënkryetari i LDK-së, Agim Veliu, ka thënë se LDK-ja ka vendosur që të nisë hapat për rrëzimin e Qeverisë Haradinaj përmes mocionit.

Ai ka thënë se janë duke i bashkërenduar veprimet me subjektet opozitare për t’i siguruar votat e mjaftueshme për ta rrëzuar qeverinë, duke përmendur votat edhe të deputetëve të partive në koalicion.

Veliu ka thënë se LDK-ja nuk do t’i bashkohet protestës së të shtunës të thirrur nga Vetëvendosje, ngase sipas tyre, ende ka hapësirë institucionale që vendin ta çojnë në zgjedhje të parakohshme.

Nëse kjo nuk arrihet, sipas Veliut, LDK-ja do të kërkojë rrëzimin e qeverisë edhe përmes protestave.

Ndërsa shefi i GP-së të LDK-së, Avdullah Hoti, duke komentuar vizitën e presidentit dhe kryeministrit në SHBA, ka thënë se Kosova është dëshmitare i një politike “mish-mash”.