Synohet ulja e çmimit të biletave

Foto ilustrim (Keystone)

Hapësira e ulët ajrore e Kosovës nga ky muaj pritet të merret nën menaxhim të autoriteteve kosovare, ndërsa hapësira e lartë mbi 7 mijë metra edhe për 5 vjet të tjera do të vazhdojë të menaxhohet nga shteti i Hungarisë. 

Ministri i Infrastrukturës, Pal Lekaj,  ka thënë se vendi ynë ndodhet para kësaj situate në mungesës së resurseve njerëzore. 

Ai shton se në momentin kur Kosova është e gatshme për këtë detyrë, do ta marrë mbi kompetencat e saj edhe hapësirën e lartë ajror. Sipas Lekajt, kjo do ndikojë edhe në uljen e çmimeve të biletave në Aeroportin e Prishtinës, të cilat tani për tani janë ndër më të lartat në rajon. 

“Sa i përket hapësirës së ulët ajrore, ne jemi në kontakt me selinë e NATO-s, me vendimmarrësit dhe unë shpresoj që në vitin 2019 do kemi vendim pozitiv që Kosova t’i marrë përgjegjësitë e hapësirës së ulët ajrore… Kur e thashë që ne do të marrim përgjegjësinë e hapësirës së ulët ajrore, në atë drejtim do të ndikojë marrja e përgjegjësisë të autoritetit kosovar të Kosovës, mendoj që ndikon dukshëm edhe në uljen e çmimit të biletave dhe i shkurton korridoret”, ka thënë Lekaj për Kosovapressin. 

Por, krahas kësaj, menaxheri për planifikim të fluturimeve në aeroportin ndërkombëtar të Prishtinës “Adem Jashari”, Driton Hyseni, thotë se për uljen e çmimeve të biletave, aeroporti ka në plan përmes programeve nxitëse të rrisë konkurrueshmërinë në mes kompanive ajrore që do operojnë në këtë aeroport.