Mali i Zi, masa drastike për Shqipërinë dhe Kosovën

Kërkohet testi Covid-19 në kufi

Mali i Zi ka vendosur masa drastike ndaj Shqipërisë dhe Kosovës me rastin përkeqësimit të situatës së Covid-19 në rajon. Kështu, duke nisur që sot të gjithë udhëtarët nga vendi ynë dhe Kosova do të mund të kalojnë kufirin për në Malin e Zi vetëm nëse kanë një test që tregojnë se nuk janë prekur nga Covid-19.

Qeveria malazeze ka vendosur mbrëmjen e së enjtes që Shqipëria e Kosova, bashkë me 4 vende të tjera, të futen në ‘listën e verdhë’ të rrezikut për Covid-19.

Qytetarët nga këto vende do të mund të udhëtojnë nëse kanë një test të metodës PCR ose serologjik, jo më të vjetër se 72 orë. Test me metodën PCR tregon nëse personi është i infektuar në atë moment, kurse testi serologjik tregon nëse personi e ka kaluar koronavirusin.

Përveç Shqipërisë e Kosovës, në listën e verdhë bëjnë pjesë dhe Singapori, Libani, Izraeli dhe Bosnjë e Hercegovina.

---