Mali i Zi e konteston arbitrazhin si opsion për demarkacionin

Ministri i Jashtëm i Malit të Zi, Srgjan Darmanoviq, ka thënë se vendi i tij nuk e përkrah kërkesën e Haradinajt për arbitrazh, për faktin se Kuvendi i Malit të Zi e ka ratifikuar marrëveshjen

Ideja e kryeministrit të Kosovës, Ramush Haradinaj për ta çuar në arbitrazh ndërkombëtar çështjen e demarkacionit me Malin e Zi duket se janë të pamundura, pasi që Podgorica nuk po pranon që kjo çështje të ndërkombëtarizohet. Madje ministri i Jashtëm i Malit të Zi, Srgjan Darmanoviq, ka thënë se vendi i tij nuk e përkrah kërkesën e Haradinajt, për faktin se Kuvendi i Malit të Zi e ka ratifikuar marrëveshjen.

“Ne këtë e kemi zgjidhur, kështu që nuk them se kemi nevojë për këtë e për arbitrazh gjithmonë nevojiten dy e në këtë rast nga ana jonë mendojmë se nuk është rruga që duhet shkuar, rruga është t’i përmbahemi marrëveshjes së nënshkruar”, ka thënë Darmanoviq në një intervistë për KTV.

Darmanoviq ka vlerësuar se qëndrimi i kryeministrit Haradinaj nuk paraqet realitetin aktual.

“Nuk kam asgjë kundër këtij qëndrimi, meqë është qëndrim i kryeministrit të një vendi, por nuk është qëndrim i Malit të Zi, e në arbitrazh duhet të shkojnë dy subjekte, e jo një, kështu që mendoj se ky qëndrim nuk e paraqet realitetin aktual”, ka thënë ai.

“Nuk mundem në asnjë mënyrë të përzihem në vendimet e institucioneve në Kosovë, ai është shtet sovran kështu që me çfarë shpejtësie kjo çështje do të përfundojë, kjo është çështje e institucioneve kosovare”, përfundoi Darmanoviq.

Ndryshe, kryeministri i Kosovës, Ramush Haradinaj ka thënë se çështja e marrëveshjes për demarkacion me Malin e Zi mund të përfundoj në arbitrazh. “Nëse mendojnë që është në rregull të rinegociojmë, po – nëse jo, mund të përfundojmë në arbitrazh”, është shprehur kryeministri kosovar.