Maqedonia po voton, 7500 vëzhgues po e monitorojnë procesin

Zgjedhjet në Maqedoni po i vëzhgojnë 7.585 vëzhgues vendas, 667 vëzhgues të huaj dhe 75 gazetarë të huaj

Që nga ora 7 e mëngjesit, në gjithë Maqedoninë ka filluar procesi i votimit, në zgjedhjet e 9-ta parlamentare, që kësaj here konsiderohen të parakohshme. Sipas informatave zyrtare, me kohë janë hapur të gjitha vendvotimet (3480) dhe është shpërndarë materiali “senzitiv”.

Në zgjedhje marrin pjesë 11 subjekte politike: 6 parti dhe 5 koalicione me 58 lista për deputetë me 1092 kandidatë. Zgjedhjet do të mbahen në 3.480 qendra votimi në gjashtë njësi zgjedhore në Maqedoni dhe në 46 qendra votimi në njësinë e shtatë zgjedhore që e përfshin diasporën.

Të drejtë vote në këto zgjedhje kanë 1.78 milion qytetarë të regjistruar në Listën zgjedhore. Të drejtën e votimit mund ta realizojnë me letërnjoftim ose pasaportë.

Këto zgjedhe konsiderohen jetike për të ardhmen evropiane të Maqedonisë, ndërsa mbahen në periudhën me delikate, kur në këtë Republikë ish Jugosllave ka stagnuar gjithë procesi integrues dhe ekonomik. Zgjedhjet vijnë pas një skandali përgjimesh që e ka përfshirë ish qeverinë e kaluar.

Por, vetëm tri orë pas procesit zgjedhor, janë regjistruar disa parregullsi nga asociacioni qytetar “Most”. Darko Alekson, drejtor ekzekutiv i këtij asociacioni njoftoi se vëzhguesit në teren kanë njoftuar se dy vendvotime janë hapur me vonesë, ndërsa për dy votues është raportuar se e kanë fotografuar votën e tyre.

Zgjedhjet në Maqedoni po i vëzhgojnë 7.585 vëzhgues vendas, 667 vëzhgues të huaj dhe 75 gazetarë të huaj. Sipas të dhënave të Komisionit Shtetëror të Zgjedhjeve, për zgjedhjet janë akredituar edhe 354 përkthyes.