Maurer: Zvicra nuk ka rrezik akut nga ISIS-i

"Duke qenë “pa një të kaluar koloniale” dhe pa pjesëmarrje në konflikte, Zvicra gjithsesi është më pak në shënjestër se sa, për shembull, Franca"

Lidhur me ndonjë sulm të mundshëm të terroristëve të Shtetit Islamik (IS) në Zvicër ka pasur edhe reaksione të ekzagjeruara. Kështu ka thënë ministri i mbrojtjes i Zvicrës, Ueli Maurer në një intervistë dhënë gazetës zvicerane në gjuhën frënge “Le Temps”.

“Pa panik”! Kështu ka komentuar ai zhvillimet më të reja në vend. Sipas tij Shërbimi Informativ i vendit (NDB) është prej vitesh i përkushtuar në mbikëqyrjen e terrorizmit dhe xhihadizmit. Maurer më tutje ka thënë se “parandalimi është i rëndësishëm, sidomos mbikëqyrja e faqeve të internetit”.

Ai ka shtuar se Zvicra nuk është neutrale në luftën kundër terrorizmit. Ajo është e eksponuar dhe në këtë kuptim ekziston nevoja e koordinimit ndërkombëtar. Por, duke qenë “pa një të kaluar koloniale” dhe pa pjesëmarrje në konflikte, Zvicra gjithsesi është më pak në shënjestër se sa, për shembull, Franca.

Ministri zviceran i mbrojtjes ka theksuar se Zvicra dhe Franca janë në situata të ndryshme. “Myslimanët në Zvicër janë të integruar mirë, për ndryshim nga ajo çfarë ndodhë në disa periferi qytetesh franceze”, ka thënë ai, duke aluduar në trazirat e të huajve, krysisht myslimanë në paralagjet e Parisit dhe qyteteve tjera franceze kohë më parë.