Mavraj trondit Kombëtaren, mungon një muaj

Mërgim Mavraj ka pësuar një lëndim në gju dhe do të mungojë rreth katër javë. Ai do të mungojë për ndeshjen ndaj Italisë më 24 mars

Një lajm shumë i hidhur vjen nga futbollisti i kombëtares shqiptare, Mërgim Mavraj, shkruan albinfo.ch.

Mavraj ka pësuar një lëndim dhe sipas njoftimit të bërë nga klubi gjerman, ku u transferua në janar, Hamburg, ai do të mungojë rreth 4 javë.

Faqja zyrtare e klubit bën të ditur se lojtari shqiptar ka probleme me gjurin. “Shumë e hidhur: Mërgim Mavraj, të mërkurën, në ndeshjen e Kupës së Gjermanisë, ka pësuar një plasaritje në zonën e gjurit të majtë dhe do të jetë rreth 4 javë larg fushave. U shërofsh shpejt, Mërgim!”, shkruhet në njoftimin e Hamburg SV.

Kështu Mavraj do të mungojë për ndeshjen shumë të rëndësishme të Kombëtares shqiptare ndaj Italisë, takim që do të zhvillohet më 24 mars në Palermo të Italisë. Berat Gjimshiti dhe Etrit Berisha janë të suspenduar për këtë ndeshje.