Mbi 9 miliardë orë pune pa pagesë

Pjesa më e madhe e punës pa pagesë realizohet nga gratë. Ato bëjnë më shumë se 60 për qind të punës së pa paguar, kur dihet se gratë punojnë më tepër në shtëpi dhe rreth familjes

Gjatë vitit të kaluar në Zvicër janë realizuar më shumë se 9 miliardë orë pune të pa paguar. Kjo shifër është madje më e madhe se sa ajo e orëve të punës së rregullt me pagesë, njofton Zyra Federale për Statistikë (BfS), shrkuan srf.ch.

Ndryshe, nëse puna e papaguar do të vlerësohej sipas çmimeve të tregut të punës, i bie se për të duhej të paguheshin 408 miliardë franga, konsideron BfS, transmeton albinfo.ch. Sigurisht, pjesën më të madhe të punës së papaguar apo “gratis” ose “vullnetare”, e përbën puna shtëpiake. Kësaj i shtohet pastaj përkujdesja për fëmijët dhe të rriturit si dhe puna “e pastër” vullnetare.

Siç mund të merret me mend, pjesa më e madhe e punës pa pagesë realizohet nga gratë. Ato bëjnë më shumë se 60 për qind të punës së pa paguar, kur dihet se gratë punojnë më tepër në shtëpi dhe rreth familjes.

Për realizimin e këtij studimi, BfS ka marrë në shqyrtim të gjithë popullatën me qëndrim të përhershëm në Zvicër, nga mosha 15 vjeçare e tutje.