Me protesta kundërshtohet logoja e re të FFK-së

Anëtari i grupit Prishtina Designers, Arben Lezi, përmes një postimi në Facebook ka bërë të ditur se do të ketë protestë më 19 qershor para zyrave të FFK-së, në shenjë pakënaqësie për logon e re të Federatës së Futbollit të Kosovës

Tifozët e futbollit në Kosovë kanë njoftuar se të martën do të protestojnë para objekteve të Federatës së Futbollit të Kosovës për ta kundërshtuar logon e re, e cila u prezantua të shtunën së bashku me fanellat e reja të përfaqësueses së Kosovës.

Anëtari i grupit Prishtina Designers, Arben Lezi, përmes një postimi në Facebook ka bërë të ditur se do të ketë protestë më 19 qershor para zyrave të FFK-së, në shenjë pakënaqësie për logon e re të Federatës së Futbollit të Kosovës.

Reagime ka pasur nga më të ndryshmet, teksa artisti Rrezeart Galica ka thënë: “Kjo logo duhet të anulohet, mos formoni komisione matrapazësh, sepse rezultati është si më poshtë”.

I pakënaqur është edhe kryetari i tifozerisë së Kosovës “Dardanët”, Lulzim Berisha, i cili ka shkruar në Facebook se do ta pranojë me shumë kënaqësi vetëm nëse është zgjedhur nga i ndjeri Fadil Vokrri. Por sekretari i FFK-së, Eroll Salihu, ka thënë për mediet në Prishtinë se logo është unike dhe atë e kanë zgjedhur komisionet profesionale. Ai ka thënë se logo i ka pëlqyer shumë edhe presidentit të ndjerë, Fadil Vokrrit.