Media britanike: Shqipëria mes vendeve më mahnitëse

Bota jonë është e madhe, e bukur dhe emocionuese, kryesisht sepse është e përbërë nga një diversitet kulturash, shkruan Elise Christian në të përditshmen britanike “Rest Less”, përcjell albinfo.ch.

Kultura është thelbësore për ekzistencën njerëzore dhe përshkruan besimet, vlerat dhe traditat e përbashkëta me të cilat jeton çdo komunitet. Udhëtimi në vende me kultura ndryshe nga e jona mund të jetë jashtëzakonisht i dobishëm.

Jo vetëm që ofron perspektiva të reja mbi botën, por gjithashtu mund të na ndihmojë të krijojmë lidhje të pasura dhe kuptimplote me një gamë njerëzish. Nëse dëshironi të shijoni muzikën “mariachi” në Meksikë, të eksploroni majat dramatike të Shqipërisë apo të bëni një ekskursion në “Fushat e Vrasjes” në Kamboxhia, ju rekomandojmë 13 vendet më mahnitëse për zbulime kulturore.

Shqipëria

Ndërsa Shqipëria ka regjistruar një rritje të turizmit vitet e fundit, kultura e saj rurale mbetet e fortë, me shumë vendas të punësuar në punë bujqësore. Shqipëria është gjithashtu një vend me plazhe të mrekullueshme, fshatra idilikë, pamje mahnitëse të Alpeve dhe vende historike të magjepsëse, siç janë mbetjet nga Perandoria Osmane. Ky vend i Evropës Jugore ka edhe shumë xhevahire të fshehura.

Për shembull, “Syri i Kaltër” është një burim me ujëra blu verbues me një thellësi të panjohur, ndërsa, në qytetin e Gjirokastrës, të listuar në UNESCO, shtëpitë prej guri ngjajnë me fortesa të vogla dhe rrugët me kalldrëm ju çojnë në pazarin e Qytetit të Gurtë.

“Rest Less” ka sugjeruar 13 destinacionet më të mira për të eksploruar në botë:

1. Shqipëria; 2. Peruja; 3. Kamboxhia; 4. Kina; 5. Portugalia; 6. Guatemala; 7. Japonia; 8. Nepali; 9. Turqia; 10. Maroku; 11. Jordania; 12. Etiopia; 13. Meksika