Memoriali i ri i Holokaustit përurohet në Vjenë

Bëhet e ditur se memoriali i ri i Holokaustit që përkujton hebrenjtë nga Austria, të vrarë nga nazistët, është përuruar sot në Vjenë, përcjell albinfo.at.

Thuhet se janë 64,440 emra të gdhendur në 160 pllaka graniti të vendosura në një mur oval, në një park pranë Universitetit të Vjenës.

E marta shënon përvjetorin e masakrave naziste në vitin 1938, të njohur si Krystallnacht, ose Nata e Xhamave të Thyer.

Kancelari austriak, Alexander Schallenberg dhe ministri izraelit i Punëve të Jashtme dhe Diasporës, Nachman Schai, morën pjesë në këtë ceremoni.

Gjithashtu, i pranishëm ishte edhe iniciatori i “Name Walls”, Kurt Yakov Tutter.

Tutter është një i mbijetuar i Holokaustit, i cili u largua nga Vjena në vitin 1939. Ai luftoi për realizimin e këtij memoriali për dy dekada.

Schallenberg kujtoi rolin e vendit gjatë regjimit nazist.

“Për një kohë të gjatë, Austria e ka parë veten në mënyrë ekskluzive si viktimë e nacionalsocializmit, por shumë njerëz qëndruan në Heldenplatz në mars të vitit 1938 dhe u bashkuan në brohoritje, shumë prej tyre vëzhguan madje morën pjesë, ndërkohë që bashkëqytetarët e tyre u grabitën, u dëbuan dhe u vranë”, tha Schallenberg.

“Kjo krijoi një përgjegjësi të madhe për të mbrojtur jetën e hebrenjve kudo ku është e nevojshme”, tha Schallenberg.  /ata