Mësuesja i hedh flakën vetës para nxënësve

Një mësuese e matematikës, 44 vjeçe, depresive dhe në konflikt me nxënësit e saj u përpoq të enjten të vetëdigjet me zjarr në oborrin e shkollës së saj në Béziers (Francë). Ajo gjendet tani në gjendje shëndetësore të rëndë.

Të enjten në mëngjes mësuesja kishte ardhur në shkollë me një kantë benzini. Ajo ka zhvilluar mësimin dha pastaj është vendosur në qendër të oborrit të shkollës, gjatë kohës së pushimit. Pastaj e heshtur është stërpikur dalë nga dalë me benzin para se t’ia fuste flakën zjarrit, kanë shpjeguar disa prindër të nxënësve.

“Ky është një akt i kryer nga një person i cila ka humbur shpresën”, ka pohuar prokurori Patrick Mathé duke theksuar se veprimi në fjalë ka qenë “një përpjekje për vetëvrasje në lidhje me aktivitetin e saj profesional”.

Sipas dëshmitarëve të intervistuar nga shtypi, gruaja ishte në konflikt me disa nxënës, të cilët ishin shumë problematikë dhe të cilët kundërshtonin vazhdimisht metodat e mësimit të saj. Javën e kaluar, sipas gjasave, mësuesja kishte tentuar të bisedojë me nxënësit e saj, por ky hap i saj i pasuksesshëm duket se e ka brengosur shumë mësimdhënësen.

Sipas prokurorit të Républikës Beziers, mësuesja “do të shpëtojë prapëseprapë”, parashikimet i mjekëve mbetën pozitive falë ndërhyrjes me kohë të stafit të urgjencës si dhe të atij të studentëve. E djegur në shkallën e tretë, ajo është transportuar në repartin e spitalit të Montperllier-it për të djegurit e rëndë.

Një qelizë psikologjike

“Është pa dyshim një tragjedi e tmerrshme për komunitetin e tërë shkollës dhe unë dua që së pari të ketë një mendim për familjen dhe për të afërmit e saj, e pastaj për të gjithë komunitetin e shkollës, e cila pa dyshim është prekur thellë”, ka thënë ministri i Arsimit, Luc Chatel.

“Unë kam kërkuar krijimin e një njësie psikologjike, e cila është duke u krijuar tani”, tregon Luc Chatel, i cili pohon se për momentin nuk është në dijeni në mënyrë të qartë për arsyet e këtij akti.