Migrosi raporton një rënie prej 1.9 për qind në shitje

Ai ka realizuar shitje prej 31.9 miliardë frangash zvicerane në vitin 2025. Shitja e disa dyqaneve të specializuara ka ndikuar në rezultatet aktuale të Migrosit

Rrjeti më i madh i shitjes me pakicë në Zvicër, Migrosi ka gjeneruar shitje prej 31.9 miliardë frangash zvicerane në vitin 2025. Kjo përfaqëson një rënie prej 1.9 përqind krahasuar me vitin e kaluar, njoftoi Migros të premten, transmeton albinfo.ch.

Shitja e disa dyqaneve të specializuara ka ndikuar në rezultatet aktuale të Migrosit. Që nga viti 2024, Migrosi ka shitur, ndër të tjera, shitoret e specializuara për shitje të prodhimeve të veçanta si Micasa, SportX dhe Hotelplan, njofton srf.ch.

Sidoqoftë, duke përjashtuar këto njësi biznesi të shitura, shitjet në fakt janë rritur me pak më shumë se një për qind, sipas njoftimit të bërë nga Migrosi.

Shitësi me pakicë online Galaxus, që bën pjesë në rrjetin e Migrosit, në veçanti, ka shënuar një rritje të fortë vitin e kaluar.

Migrosi ka festuar vitin e kaluar njëqindvjetorin e themelimit të tij.

---