Ministri Ammann kundër sanksioneve ndaj Rusisë

Ministri i ekonomisë është shprehur kritik ndaj sanksioneve dhe ka tërhequr vërejtjen për ndikimin negativ që kanë për Zicrën ashpërsimet e fundit

Qeveria e Zvicrës po kërkon të gjejë rrugë e cila do t`i mundësonte të mos u bashkohej sanksioneve ekonomike që ka vendosur BE kundër Rusisë. Në këtë kuptim, ministri i ekonomisë, Johann Schneider Ammann ka tërhequr vërejtjen për rrezikun që mund të pësojë Zvicra nga “mbajtja e anës” ndaj njërës palë në konflikt ose tjetrës.

Amman madje e hedh poshtë mundësinë që aktualisht Zvicra t`u bashkohet sanksioneve të BE-së. Në intervistën e tij të dhënë për gazetën e të dielës “Schweiz am Sonntag” ai ka siguruar se Zvicra nuk do të shfrytëzohet si platformë “bajpasi” në këtë drejtim.

Qëndrimin kundër sanksioneve ndaj Rusisë Ammann e ka argumentuar edhe me rolin ndërmjetësues të Zvicrës në krizën e Ukrainës. Ky rol, në rast se Zvicra do t`u bashkohej sanksioneve të vendosura nga Bashkimi Evropian, do të dobësohej. Ministri i ekonomisë i Zvicrës është shprehur kritik ndaj sanksioneve dhe ka tërhequr vërejtjen për ndikimin negativ që kanë për Zicrën ashpërsimet e fundit.

Nga ana tjetër, organizata që bashkon ndërmarrjet ekonomike të Zvicrës, Economiesuisse, është shprehur se nuk do të ishte kundër në rast se qeveria e Zvicrës i bashkohet BE-së në sanksionet kunër Rusisë. Me një pjesëmarrje prej 1.5 të Rusisë në eksportet e Zvicrës, ky vend nuk përbën ndonjë treg me rëndësi ekzistenciale për Zvicrën”, ka thënë drejtuesi i kësaj organizate, Jan Atteslander.