Ministri gjerman: “Si prind në Kosovë, edhe unë do ta kisha provuar të vija në Gjermani”

Megjithatë ne jemi të detyruar që këtyre njerëzve t`u themi shumë shpejt se ata nuk kanë këtu të drejtë për azil dhe rrjedhimisht, nuk kanë perspektivë që të mbeten te ne”, thotë Jäger

Republika Nordrheinwestfallen e Gjermanisë deri tash ka strehuar më së shumti refugjatë në krahasim me landet tjera të vendit, rreth 91 mijë. Ministri i brendshëm i landit, Ralf Jäger nga SPD flet për gazetën “Die Welt” lidhur me sfidat dhe gatishmërinë e njësisë federale që ai e udhëheq, për të përballuar sa më mirë fluksin e madh të refugjatëve, përcjell albinfo.ch. Ai veç tjerash bën fjalë edhe për refugjatët “ekonomikë” ose të varfërisë, kategori kjo që nuk gëzon të drejtë azili dhe në të cilën hyjnë kosovarët.

“Unë mund ta kuptoj motivin që kanë refugjatët e varfërisë. Si baba, kryefamiljar në Kosovë, edhe unë do të provoja të vi në Gjermani. Megjithatë ne jemi të detyruar që këtyre njerëzve t`u themi shumë shpejt se ata nuk kanë këtu të drejtë për azil dhe rrjedhimisht, nuk kanë perspektivë që të mbeten te ne”, thotë Jäger duke iu referuar mosdurimit në rritje të popullatës në Gjermani ndaj kësaj kategorie.

Mjerisht procedurat e azilit po zgjasin tepër shumë. Për këtë arsye federata duhet t`i përpunojë më shpejtë këto kërkesa, transmeton albinfo.ch. Ne duhet t`i kemi parasysh edhe situatën e mjerueshme të refugjatëve nga Ballkani: njerëzit atje shesin krejt çka kanë, u paguajnë 2000 euro bandave të trafikimit, qëndrojnë ca muaj këtu dhe pastaj duhet të kthehen në vend ku nuk kanë asgjë para vetes. Këto janë tragjedi njerëzore.

Për këtë arsye ne duhet të bëjmë çdo gjë në mënyrë që të mos e bëjnë të njëjtën gjë ehde më shumë njerëz”, ka thënë ministri i brendshëm i NRW, Ralf Jäger.