Miratohet ndryshimi i Projektligjit për financimin e partive në Kosovë

Komisioni Parlamentar për Integrime Evropiane ka miratuar projektligjin për ndryshimin e Ligjit për financimin e subjekteve politike.

Dy partitë opozitare, LDK-ja e VV-ja, kanë qenë kundër këtij projektligji.

Deputetja e Vetëvendosjes, Fatmire Kollqaku, ka thënë se projektligjin si të tillë nuk do ta votojë dhe menjëherë pas fjalimit e ka lëshuar mbledhjen, raporton KTV, transmeton albinfo.ch.

Kundër këtij projektligji është deklaruar edhe Armend Zemaj i LDK-së, i cili ka thënë se projektligjin nuk do ta votojë, që i njëjti të shkojë në seancë për miratim, për shkak se mënyra se si po tentohet të rregullohet financimi nuk është e drejtë.

Ndërsa, deputeti i PSD-së, Visar Imeri, ka thënë se kërkesa e tyre ka qenë që ky projektligj të përcaktojë financimin në mënyrë të barabartë të grupeve të reja parlamentare edhe me grupet e tjera.

Anëtari i PDK-së, Zenun Pajaziti, tha se ky ligj ndihmon reformën zgjedhore. Ndërsa, për shkak se nuk kishte kuorum, ka dështuar të mbahet mbledhja e Komisionit për të Drejtat, Interesat e Komuniteteve, ku në rend dite ishte shqyrtimi i Ligjit për financimin e subjekteve politike.