Murtezaj në Bled kërkon përshpejtimin e proceseve integruese

Valon Murtezaj ka theksuar motivin e lartë të Kosovës në përcaktimin e qartë për integrime evropiane dhe euroatlantike

Kosova ka kërkuar nga Bashkimi Evropian që proceset integruese të përshpejtohen.

Këtë e ka bërë zëvendësministri në detyrë i Punëve të Jashtme, Valon Murtezaj në ditën e dytë të punimeve në Forumin Strategjik në Bled të Sllovenisë, përcjell albinfo.ch.

Murtezaj ka theksuar motivin e lartë të Kosovës në përcaktimin e qartë për integrime evropiane dhe euroatlantike, si dhe vullnetin e palëkundur të Institucioneve të Republikës së Kosovës për të kryer pjesën e punëve dhe detyrave në këtë synim.

Në këtë diskutim morën pjesë ministrat e jashtëm të vendeve të Ballkanit Perëndimor, si dhe përfaqësues nga institucione tjera të rëndësishme, si Komisioni Evropian, BERZH, dhe nga Departamenti Amerikan i Shtetit.

Forumit Strategjik i Bledit është njëri nga organizimet më të rëndësishme, ku diskutohet për zhvillime të gjithëmbarshme globale.