NATO-ja refuzon të përfshihet në bllokimin e Ngushticës së Hormuzit

Aleatët europianë kundërshtojnë planin e Trumpit, ndërsa tensionet brenda aleancës pritet të rriten

Aleatët e NATO-s kanë deklaruar të hënën se nuk do të përfshihen në planin e presidentit amerikan Donald Trump për të bllokuar Ngushticën e Hormuzit, duke propozuar që ndërhyrja të bëhet vetëm pas përfundimit të luftimeve, përcjell albinfo.ch.

Ky qëndrim i vendeve aleate pritet të rrisë tensionet brenda aleancës dhe të shkaktojë pakënaqësi në Uashington, në një periudhë kur marrëdhëniet mes Trumpit dhe disa shteteve europiane kanë qenë të tensionuara.

Trump ka deklaruar se ushtria amerikane do të bashkëpunojë me vende të tjera për të ndaluar trafikun detar në këtë rrugë ujore strategjike, pas dështimit të bisedimeve të fundjavës për arritjen e një marrëveshjeje që do t’i jepte fund konfliktit gjashtëjavor me Iranin.

Më pas, ushtria amerikane ka sqaruar se bllokada, e cila ka nisur në orën 16:00 me kohë të Kosovës, do të zbatohet vetëm për anijet që shkojnë drejt ose kthehen nga portet iraniane.

Që nga nisja e luftës më 28 shkurt, Irani ka bllokuar pjesërisht ngushticën për shumicën e anijeve, duke lejuar kryesisht vetëm lëvizjen e mjeteve të veta detare. Teherani ka kërkuar që kontrolli mbi këtë rrugë ujore të bëhet i përhershëm, madje duke lënë të hapur mundësinë për vendosjen e taksave ndaj anijeve që e përdorin atë.

“Bllokada do të fillojë së shpejti. Vende të tjera do të përfshihen në këtë bllokadë”, ka shkruar Trump të dielën në Truth Social.

Megjithatë, aleatët e NATO-s, përfshirë Britaninë e Madhe dhe Francën, kanë refuzuar të marrin pjesë në këtë veprim, duke deklaruar se po punojnë për një iniciativë që synon të mbajë të hapur rrugën ujore, ku normalisht kalon rreth një e pesta e furnizimeve globale me naftë.

Refuzimi i aleatëve shihet si një tjetër pikë përplasjeje me Trumpin, i cili më herët ka kërcënuar me tërheqje nga NATO dhe po shqyrton mundësinë e reduktimit të trupave amerikane në Evropë. Situata është komplikuar edhe më shumë pasi disa vende europiane kanë refuzuar t’u lejojnë avionëve ushtarakë amerikanë përdorimin e hapësirës ajrore për sulme ndaj Iranit./Albinfo.ch.

---