Ndahet nga jeta veprimtari i çështjes kombëtare, Ilir Mustafa

Të hënën, më 3 prill në Annemase të Francës është ndarë nga jeta veprimtari i shquar Ilir Mustafa. Iliri, prej më shumë se 20 vitesh, si i përndjekur politik kishte mërguar në Francë ku i ishte kushtuar veprimtarisë patriotike, në mbështetje të çlirimit dhe ndërtimit të Kosovës. Ai kishte krijuar miqësi e lidhje të fuqishme me politikanë francezë dhe të tjerë, të Evropës përmes të cilëve kishte lobuar për Kosovën. Sensibilizimin me çështjen e Kosovës e kishte bërë në organizatat evropiane me seli në Strasburg e gjetiu, në të cilat kishte qasje të vazhdueshme.

Angazhimi i tij ka sjellë veç tjerash edhe themelimin e asociacionit “Kosova-Ensemble” (Kosova – Së bashku) me seli në Francë. Kjo organizatë e kishte edhe zyrën e saj në Kosovë, gjegjësisht në Gjilan dhe ka ndihmuar me shumë projekte në këtë qytet e gjetiu.

Iliri ka vdekur në moshën 57 vjeçare pas një sëmundjeje tërëndë e të gjatë. Varrimi i të ndjerit do të bëhet sot, më 5 prill, në vendlindjen e tij, në Gjilan.