Ndërhyn për t`i pajtuar, theret me thikë shqiptari 16 vjeçar

Në një zënkë që ka ndodhur në një kamp azili në Bensheim të Gjermanisë, mbrëmjen e të enjtes kanë pësuar lëndime pesë refugjatë të moshave të reja.

Sç bën të ditur policia, një shqiptar 16 vjeçar ka provuar të ndërhyjë në konfliktin në mes të një eritreani dhe një banori tjetër të kampit shkruan agjencia gjermane e lajmeve dpa. Për pasojë, eritreani e ka goditur shqiptarin me thikë dhe i ka shkaktuar lëndime në krah, transmeton albinfo.ch.

Në tollovinë e krijuar pastaj pasi që eritreani i përmendur ka vazhduar të kërcënojë dhe të qëllojë me thikë, janë lënduar lehtë edhe katër refugjatë të tjerë. Vetëm ndërhyrja e shërbimit të sigurimit ka arritur ta qetësojë situatën.

Policia bën me dije se eritreani kishte qenë nën ndikimin e alkoolit.