Ndërron jetë nga Covid 19 ish-presidenti i Francës

Është bërë e ditur se ish-presidenti i Francës, Valéry Giscard d’Estaing, ka ndërruar jetë nga koronavirusi. Ai ishte 94 vjeç. Muajt ​​e fundit ai ishte shtruar në spital disa herë, fillimisht në Paris dhe më pas në Tours, për një infeksion të lehtë në mushkëri dhe probleme të zemrës, shkruajnë mediat franceze, përcjell albinfo.ch.

Familja shpjegoi se vdekja u shkaktua nga ndërlikimet në lidhje me Covid 19. Një pro-evropian i madh, ai ishte kreu i shtetit francez nga viti 1974 deri më 1981.

Ish-udhëheqësi francez kujtohet për prirjen e tij për modernizim në shoqërinë franceze, duke lejuar divorcin me mirëkuptim dypalësh, legalizimin e abortit, si dhe ishte një ndër arkitektët e integrimit evropian.

I zgjedhur president në moshën 48-vjeçare, ai erdhi në post pas udhëheqjes së De Golit dhe u përpoq të liberalizonte ekonominë dhe normat sociale. Ai humbi në përpjekjet e tij për t’u rizgjedhur përballë socialistit Francois Mitterrand.

Ai krijoi lidhje të ngushta me ish-kancelarin e Gjermanisë Perëndimore, Helmut Schmidt dhe së bashku ata hodhën themelet për një monedhë të përbashkët evropiane, pasi krijuan Sistemin Monetar Evropian.